આપણું નડિયાદ

નડિયાદ જિલ્લાની નવાજૂની

ઠાસરામાં સરદાર આવાસમાં વ્યાપક ગોટાળા


નડિયાદ, તા.૨૯
ઠાસરા તાલુકાના ગ્રામ્ય વિસ્તારોમાં બી.પી.એલ.લાભાર્થીઓને સરકાર દ્વારા મળવાપાત્ર તમામ લાભોમાં સરકારી અધિકારીઓની ટકાવારી અને ભાગીદારીને કારણે સાચા લાભાર્થી સુધી સરકારે આપેલી રકમ પુરેપુરી પહોંચી શકતી નથી.ખેડા જિલ્લા ગ્રામ વિકાસ અજન્સી દ્વારા વર્ષ ર૦૦૯-૧૦ દરમ્યાન નડિયાદ ખાતે યોજાયેલ ગરીબ કલ્યાણ મેળામાં ગરીબી રેખાના લાભાર્થીઓને મફત ઘરથાળનો પ્લોટ ફાળવવામાં આવ્યા હતા.લાભાર્થીઓને સનદ્ તથા હુકમ મળ્યા બાદ જિલ્લા પંચાયત આવાસ યોજના હેઠળ મકાન બનાવવા માટે રૃ.પ૦,પ૦૦/- ની ગ્રાન્ટ મંજુર કરવામાં આવી હતી,જેમાં ૪૩,પ૦૦/-રૃ. નિયત કરેલા હપ્તા મુજબ અને રૃ.૭૦૦૦/- લાભાર્થી દ્વારા શ્રમફાળા તરીકે ગણવામાં આવે છે.આમ ઉપરોક્ત યોજના અન્વયે મંજુર થયેલા આવાસ બનાવવાની કામગીરી શરૃ કરવા છતાં ઠાસરા તાલુકાના આગરવા ગામ ખાતે ૩ર જેટલા લાભાર્થીઓને પ્રથમ હપ્તાની ચુકવણીમાં પ૦૦ રૃ. કાપી લેવાયા હોવાનું તેમજ રૃ.૧૬૦૦૦નો આખેઆખો હપ્તો ડુલ કરી દેવામાં આવ્યો હોવાની ફરિયાદો ઉઠી રહી છે.આ બાબતે ઠાસરા તાલુકા વિકાસ અધિકારીને લેખિત ફરિયાદ કરવા છતાં આજસુધી જવાબદાર તલાટી કે સરપંચ સામે કોઈપણ પ્રકારની કાર્યવાહી
કરવાનું ટાળીને તાલુકા વિકાસ અધિકારી પણ શંકાસ્પદ ભુમિકામાં હોય તેવી છાપ ઉપસી રહી છે.
આ અંગે પ્રાપ્ત વિગતોનુસાર ઠાસરા તાલુકાના આગરવા ગામમાં ૩ર બીપીએલ લાભાર્થીઓને મફતમાં પ્લોટ અને આવાસની ફાળવણી કરી હતી.આવાસ બનાવવા માટે ચુકવવા પાત્ર રૃ.૪૩,પ૦૦ની રકમ જેમ જેમ મકાનની કામગીરી પુર્ણ થાય તેમ ચુકવવાની હોય છે.જિલ્લા ગ્રામ વિકાસ એજન્સી દ્વારા વર્ષ ર૦૦૯-૧૦માં નડિયાદ ખાતે યોજાયેલ ગરીબ કલ્યાણ મેળામાં મફત પ્લોટ અને હુકમની સનદ્ આપી હતી.જેને આધારે તાલુકા પંચાયત દ્વારા તા.૧૦-ર-ર૦૧૦ના રોજ આવાસ/વશી/૩૯૬/પર૭ અન્વયે પરમાર લાલાભાઈ નટુભાઈને મકાન બાંધવાની મંજુરી આપીને આવાસની રકમ મંજુર કરી હતી.લાભાર્થીએ મકાન બનાવવાની શરૃઆત કર્યા બાદ પ્રથમ તબક્કાના પ૦૦૦ રૃ. પેટેની રકમમાંથી રૃ.૪પ૦૦ ગ્રામ પંચાયતના સરપંચ દ્વારા રોકડેથી ચુકવવામાં આવ્યા હતા.આવાસ યોજનામાં સરકાર દ્વારા મળવાપાત્ર રકમ જે તે લાભાર્થીના નામના ચેકથી જ ચુકવાતી હોવા છતાં રોકડેથી ચુકવાઈ હતી.આવી જ રીતે આગરવાના તમામ લાભાર્થીઓને રોકડેથી રકમ ચુકવવામાં આવી હતી,જેમાંથી દરેક લાભાર્થીદીઠ રૃ.પ૦૦ એટલે કે ૧૬,૦૦૦ રૃ.ની રકમ ચાઉં કરી દેવામાં આવી હતી.ત્યારબાદ લાભાર્થીઓએ મકાનનું કામ આગળ ધપાવતાં બીજા હપ્તાની રકમ પેટે રૃ.૧૬,૦૦૦ મળવાપાત્ર હતી,પણ આ રકમ કોઈપણ કારણસર લાભાર્થીઓને મળી નહોતી.ત્યારબાદ લાભાર્થીને ત્રીજા હપ્તા પેટેની રૃ.૧૪૦૦૦ની રકમ ચુકવવામાં આવી હતી,જ્યારે હજી સુધી છેલ્લા હપ્તા પેટેની રૃ.૮,પ૦૦ની રકમ હજી સુધી ચુકવવામાં આવી નથી.આ અંગે છેલ્લા એક વર્ષથી ઠાસરા તાલુકા પંચાયત અને આગરવા તલાટી તેમજ સરપંચ દ્વારા આવાસ યોજનાના લાભાર્થીઓને પજવવામાં આવી રહ્યા હોવાથી તંગ આવી ગયેલા લાભાર્થીઓએ આજે પોતાના આવાસની આશા ઉપર પુર્ણ વિરામ મુકી દીધુ છે.આ અંગે સરકારી ભ્રષ્ટ અધિકારીઓ અને ચુંટાયેલા લોક પ્રતિનીધિઓનો ભોગ બનેલા લાલાભાઈ નટુભાઈ પરમારે જણાવ્યું હતું કે હું અને મારો ભાઈ ખેત મજુરી કરીને અમારી વિધવા માતા સહિત ૭ વ્યક્તિઓના પરિવારનું ગુજરાન ચલાવીએ છીએ.ગરીબ હોવાને કારણે સરકારે અમને પ્લોટ અને ઘર બનાવવા રકમ ફાળવી પણ ભ્રષ્ટ તલાટી અને સરપંચ દ્વારા આ રકમ વચ્ચેથી જ ચાઉં કરી દેવામાં આવી.આ બાબતે તાલુકા વિકાસ અધિકારી સહિત તમામ અધિકારીઓને લેખિતમાં ફરિયાદ કરવા છતાં ઉપર સુધી ભળી ગયેલા અધિકારીઓના બહેરા કાને વાત પહોંચી શકી નહોતી. પોતે માત્ર ૩ ધોરણ પાસ હોવાથી વધુ કોઈ જાણકારી કે જ્ઞાન ધરાવતા ન હોવાથી તેમની અજ્ઞાનતાનો સરકારી અધિકારીઓ દ્વારા ભારે ફાયદો ઉઠાવવામાં આવતો હોવાનું પણ તેઓએ જણાવ્યું હતું.
આ અંગે સંદેશ દ્વારા ઠાસરા તાલુકા વિકાસ અધિકારીનો સંપર્ક કરતાં તેઓએ જણાવ્યું હતું કે આગરવામાં મંજુર થયેલા તમામ આવાસોનો એગ્રીમેન્ટ આગરવા પંચાયત દ્વારા કરવામાં આવ્યો હોવાનું અને તેથી જ તમામ લાભાર્થીઓને મળવાપાત્ર રકમની ચુકવણી ગ્રામ પંચાયતને કરવામાં આવી હોવાનું જણાવ્યું હતું,જ્યારે તાલુકા પંચાયત કચેરી દ્વારા જ જે તે લાભાર્થીને જાતે જ હુકમ આપ્યો છે,ત્યારે એગ્રીમેન્ટ ક્યાંથી આુવ્યો તે પ્રશ્ન થઈ પડયો છે.આ ઉપરાંત તાલુકા પંચાયત દ્વારા લાભાર્થીઓના આવાસો તા.૩૧-૩-ર૦૧૦ સુધીમાં પુર્ણ કરી દેવાની તાકિદ હુકમમાં જ કરવામાં આવી હોવા છતાં આજે એક વર્ષથી વધુ સમય વિતી ગયો હોવા છતાં અધુરા આવાસો બાબતે પણ તેઓએ કોઈ કાર્યવાહી કરી હોવાનું જાણવા મળેલ નથી.લાભાર્થીઓએ કરેલી લેખિત રજુઆતને પગલે તાલુકા વિકાસ અધિકારી દ્વારા જવાબદાર તલાટી કમ તંત્રી કે સરપંચ સામે કોઈપણ પ્રકારના શિક્ષાત્મક પગલાં નહિ ભરવાને કારણે લાભાર્થીને પોતાની સાથે અન્યાય થયાની લાગણી થવા પામી છે. જ્યારે તાલુકાભરમાં આગરવાના લાભાર્થીઓના મંજુર થયેલા સરદાર આવાસમાં ભ્રષ્ટાચાર થયો હોવાની બુમરાણો ઉઠી હોવા છતાં તાલુકાની નેતાગીરી દ્વારા પણ શંકાસ્પદ ચૂપકિદી દાખવવામાં આવી હોવાનું જોવા મળી રહ્યું છે.
યોજનામાં ભ્રષ્ટાચાર છતાં અધિકારીઓ ચૂપ
ખેડા જિલ્લા પંચાયત સરદાર આવાસ વિભાગ દ્વારા સરકારના ધારાધોરણ મુજબ બીપીએલ લાભાર્થીઓને આવાસની ફાળવણી કરવામાં આવતી હોવા છતાં તાલુકા કક્ષાએ આવાસ યોજનાની જવાબદારી સંભાળતા અધિકારી અને જે તે પંચાયતના તલાટી અને સરપંચ દ્વારા લાભાર્થીને મળવાપાત્ર આવાસના બદલામાં નાણાકીય લાભ ખાટવામાં આવતો હોવાની વ્યાપક ફરિયાદો જિલ્લાભરમાં ઉઠતી રહી છે.ઠાસરા તાલુકાના આગરવા સહિતના ગામડાઓમાં પણ આવાસ યોજનામાં જવાબદાર અધિકારીઓ દ્વારા કટકી કરવામાં આવી છે,તેમ છતાં કોઈપણ કારણસર ખેડા જિલ્લા વિકાસ અધિકારી દ્વારા આવા ભ્રષ્ટ જવાબદાર સરકારી કર્મચારીઓ અને અધિકારીઓ પ્રત્યે કુણી લાગણી દાખવીને તેઓને આડકતરી રીતે ભ્રષ્ટાચાર માટે પ્રોત્સાહન આપવામાં આવી રહ્યું હોય તેવી હાલત જોવા મળી રહી છે.
લાભાર્થીની વિધવા મા શું કહે છે ?
ઠાસરા તાલુકાના આગરવા તાબેના કનેરીપુરામાં રહેતા અને ખેતમજુરી કરતા લાલાભાઈ નટુભાઈ પરમારને સરકાર દ્વારા મફતમાં પ્લોટ અને આવાસ યોજનાની મંજુરી આપવામાં આવી હોવા છતાં તાલુકા પંચાયતના જવાબદાર અધિકારીઓ અને તલાટી-સરપંચની મિલીભગતને કારણે મુદત પુર્ણ થયે એક વર્ષથી વધુ સમય વિતી જવા છતાં આજસુધી આવાસનું કામ પુર્ણ થઈ શક્યુ નથી.આ અંગે ખેતમુજર લાલાભાઈ પરમારની વિધવા માતાએ સંદેશને જણાવ્યું હતું કે મારો પુત્ર માત્ર ધો.૩ પાસ છે,તેને સરકારી કાગળીયામાં ઓછી સમજણ પડે છે,તેથી તાલુકા અને ગ્રામ પંચાયતના સાહેબો મારા પુત્રને આડાઅવળા જવાબો આપીને ગાંઠતા નથી.આવાસ માટે મળવાપાત્ર રકમમાંથી ૧૬૦૦૦ રૃ.ની રકમ હજી સુધી મળી નથી.તેઓએ વધુમાં જણાવ્યું હતું કે તેઓને ભગવાન વહાલા હોય તો સરકારે અમને ફાળવેલા પૈસા આપે નહિ તો તેઓ વાપરે,અમે ગરીબ બીજું કરી પણ શું શકીશું ? આમ ગ્રામ્ય વિસ્તારના કાયદાકીય અજ્ઞાન લાભાર્થીઓ પાસેથી કટકી કરી રહેલા સરકારી બાબુઓની પોલ બહાર આવી હતી.

વાંઘરોલી ગામની સીમમાંથી કતલખાનું ઝડપાયું


નડિયાદ, તા.ર૯
ઠાસરા તાલુકાના કેટલાક ગામડાઓના સીમ વિસ્તારોમાં વર્ષોથી નિર્દોષ પશુઓની કતલેઆમ કરતા કતલખાના ચાલી રહ્યા છે,આ વાતની જાણકારી ઠાસરા પીએસઆઈને થતાં તેઓએ છેલ્લા કેટલાક દિવસથી કતલખાનું શોધી કાઢવા માટે પોતાના માણસો કામે લગાડી દીધા હતા.અગાઉ પણ પોલીસે કતલખાનું ઝડપી પાડવા ભારે કમર કસી હતી,તેમ છતાં તેઓને સફળતા મળી નહોતી,જ્યારે ગઈકાલે રાત્રે બાતમી મળતાં જ ઠાસરા પોલીસ વાંઘરોલી ગામના સીમ વિસ્તારમાં શેઢી નદીના કોતરોમાં ભારે જોખમી કહી શકાય તેવા ઓપરેશનમાં લાગી ગઈ હતી,અને ગણતરીના કલાકોમાં જ નિર્દોષ ગાયોની અને ગૌ વંશની કતલેઆમ કરવામાં આવતી હતી,તે સ્થળે પહોંચી જઈને ત્રણ બળદોને જીવતા બચાવી લેવામાં આવ્યા હતા. જો કે તે અગાઉ પાંચ ગૌ વંશોની નિર્દયી રીતે કતલેઆમ કરીને તેમના ટુકડે ટુકડા કરી નાખવામાં આવ્યા હતા.અચાનક આવેલી પોલીસ સાથે કતલખાના ચલાવનારા ઈસમોએ પ્રતિકાર કરવાની કોશિશ કરી હતી,પરંતુ પુરી તૈયારી સાથે પહોંચી ગયેલા પોલીસ કાફલાએ હિંમતભેર સામનો કરીને એક ઈસમને ઝડપી પાડયો હતો,જ્યારે અન્ય બે ઈસમો અંધારાનો લાભ લઈને ભાગી ગયા હતા.
ખેડા જિલ્લાના ગ્રામ્ય વિસ્તારોમાં નિર્દોષ પશુઓની રોજેરોજ કતલેઆમ કરીને તેમનું માંસ,હાડકા અમદાવાદ તેમજ વડોદરા જેવા શહેરોમાં વહન કરવામાં આવી રહ્યા હોવાની વાતો જગજાહેર છે.ખેડા જિલ્લાના ઠાસરા, બાલાસિનોર, કપડવંજ, કઠલાલ તેમજ મહુધા જેવા તાલુકાના ગ્રામ્ય વિસ્તારોમાં રોજેરોજ નિર્દોષ પશુઓની કત્લેઆમ કરવામાં આવી રહી છે.
ઠાસરા તાલુકામાં પણ કેટલાક ગામોના સીમ વિસ્તારોમાં સ્થાનિક ઈસમો દ્વારા જ કતલખાના ચલાવવામાં આવી રહ્યા છે. ભુતકાળમાં પણ તાલુકાના ગ્રામ્ય વિસ્તારોમાં કતલખાના ઝડપી પાડવામાં આવ્યા હતા. કતલખાનામાં હિંદુઓ માટે પુજનીય એવી ગાયો ઉપરાંત ગૌ વંશ એવા બળદ,વાછરડા સહિતના પશુઓની રોજેરોજ નિર્દયી રીતે કત્લેઆમ કરવામાં આવે છે.ડાકોર તેમજ કઠલાલ સહિતના ઠેકાણે ભરાતી ગુર્જરીમાં બળદોની ખરીદી કરીને આવા બળદોને કતલખાને પહોંચાડવામાં આવતા હોવાની વાતો અનેકોવાર બહાર આવી છે. જો કે આજે વહેલી સવારે ઠાસરા તાલુકાના વાંઘરોલી ખાતે ઝડપાયેલા કતલખાનાને પગલે અલગ જ મોડેસ ઓપરેન્ડી બહાર આવી છે.
યાત્રાધામ ડાકોરમાં મંગળવારના રોજ અને કઠલાલમાં ગુરૃવાર અને શુક્રવારના રોજ ગુર્જરી ભરાય છે,જેમાં વાંઘરોલી ખેડૂદો દ્વારા બળદ કે વાછરડાની લે વેચ કરવામાં આવે છે.આ ગુર્જરીમાં અમદાવાદના કેટલાક ઈસમો કતલ કરવાના ઈરાદે ખેડૂત બનીને બળદ કે વાછરડાની ખરીદી કરવા આવે છે,અને વધુ વય ધરાવતા બળદ તેમજ સસ્તા ભાવે મળતા બળદ કે વાછરડાની ખરીદી કરી લેતા હોય છે, અને આ તમામ પશુઓને ખેડૂતના સ્વાંગમાં કતલખાના સુધી પહોંચાડીને તેમની નિર્દયી રીતે હત્યા કરી નાખતા હોય છે.
ડાકોર કે કઠલાલની ગુર્જરી માટે બળદ કે વાછરડાની ખરીદી કરવા અને ગુર્જરીમાંથી ખરીદાયેલા બળદ ચોક્કસ ગામ કે સીમ સુધી પહોંચાડવાની જવાબદારી સ્થાનિક ઈસમોને સોંપવામાં આવે છે.આવા સ્થાનિક ઈસમો બળદ કે વાછરડાને ખેતી માટે ખરીદીને લઈ જતા હોય છે.રસ્તામાં કોઈપણ જીવદયા પ્રેમી કે પોલીસ દ્વારા પુછપરછ કરવામાં આવે તો ખેતી માટે લઈ જતા હોવાનું અને પોતે ખેડૂત હોવાના પુરાવા આપીને ગુર્જરીમાંથી ખરીદીને લાવ્યા હોવાના પુરાવા રજુ કરી દતા હોય છે.જેના કારણે પોલીસ કે જીવદયા પ્રેમીઓ કંઈ કરી શકતા નથી.આવી રીતે લઈ ગયેલા બળદ કે વાછરડાઓને દરવખતે અલગ અલગ સ્થળની પસંદગી કરેલા નક્કી સ્થળે બાંધી દેવામાં આવે છે.
બીજા દિવસે અમદાવાદથી ત્રણ થી વધુ ઈસમો ટેમ્પો કે અન્ય કોઈ વાહન લઈને જે તે સ્થળે પહોંચી જાય છે,અને સ્થાનિક લોકોની મદદ લઈને રાત્રિના સમયે બળદ કે વાછરડાઓને નિર્જન ખેતરો કે નદીના કોતરોમાં લઈ જઈને કુહાડાના ઝાટકાથી પશુઓની ગરદન કાપી નાખ્યા બાદ તેમના નાના નાના ટુકડા કરી નાખતા હોય છે.આવી જ રીતે ગઈકાલે રાત્રે એકઠા થઈને વાંઘરોલી સીમમાં શેઢી નદીના કિનારે આવેલા ખેતરમાં ૮ બળદને કાપી નાખવાના ઈરાદા સાથે અમદાવાદના ત્રણ અને એક સ્થાનિક એમ કરીને કુલ ચાર ઈસમો પહોંચી ગયા હતા.
છેલ્લા કેટલાક સમયથી આ પ્રકારની પ્રવૃત્તિ ચાલતી હોવાની જાણકારીના આધારે ઠાસરા પીએસઆઈ ડી.એન.રાવ છુપી નજર રાખી રહ્યા હતા,તેઓને બાતમી મળતાં જ તેઓ પોતાના સ્ટાફ સાથે બાતમી મળેલીસ જગ્યાએ રાત્રિના સુમસામ અંધારામાં નદીના કોતરો ખેડીને ત્યાં પહોંચી ગયા હતા,પરંતુ આ સમયે જ મોબાઈલ ઉપર ફોન આવતાં લાઈટ થઈ જતાં બળદની કતલેઆમ કરી રહેલા ઈસમો ચોંકી ગયા હતા,અને કોઈ આવી રહ્યું હોવાનું જાણીને તેઓએ બુમો પાડીને પાછા જતા રહો નહિ તો મારી નાખીશું,તેમ કહેવા લાગ્યા હતા.
સુમસામ ખેતરોમાં વહેલી સવારના અંધારામાં પોલીસે સહેજપણ ડર રાખ્યા વિના આગળ વધતાં પોલીસ આવી ગઈ હોવાનું માનીને ચારેય ઈસમો ભાગી છુટયા હતા,જો કે ટેમ્પો લઈને ભાગવાની કોશિષ કરતો ટેમ્પો ડ્રાઈવર અસમતખાન રહીમખાન પઠાણ (રહે.રખિયાલ,અમદાવાદ) પોલીસના હાથે ઝડપાઈ ગયો હતો,જ્યારે અન્ય ત્રણ ઈસમો ભાગી છુટયા હતા.સ્થળ ઉપર જોતાં કઠણ કાળજાની મનાતી પોલીસ પણ દંગ રહી ગઈ હતી,કારણકે આઠમાંથી પાંચ બળદને નિર્દયી રીતે કાપીને તેમના ટુકડા કરી નાખવામાં આવ્યા હતા.કાપી નાખવામાં આવેલા બળદની ગરદનને જોઈને પીએસઆઈ રાવે જણાવ્યું હતું કે એક બળદની કપાયેલી ગરદનને જોતાં તેની આંખમાંથી આસુ ટપક્યા હોવાનું સાફ જોઈ શકાતુ હતું.
આમ પોલીસ પણ આ દ્રશ્યો જોઈને કંપી ગઈ હતી.પોલીસે ટેમ્પો નં.જીજે૧ બીઆય.૬રર૮ સહિત તમામ મુદ્દામાલ તેમજ બચી ગયેલા ત્રણ જીવતા બળદને પોતાના કબજામાં લઈને ઝડપાઈ ગયેલા ઈસમની અટક કરીને તેના સહિત અન્ય ત્રણ ઈસમો વિરૃધ્ધ કાયદેસર કાર્યવાહી હાથ ધરી હતી.ઝડપાઈ ગયેલા ઈસમે વર્ણવેલી વાતો ઉપરથી નિર્દોષ પશુઓની કતલેઆમ કરી રહેલા તત્વોની મોડેસ ઓપરેન્ડી બહાર આવી હતી.અગાઉ ચોક્કસ જગ્યાએ ચાલતા કતલખાના પોલીસની નજરમાં આવી જતા હોવાથી હવે આ કસાઈઓ કતલખાનાની ચોક્કસ જગ્યા રાખવાને બદલે અલગ અલગ જગ્યાએ કોઈના પણ ખેતરોમાં રાત્રિના સમયે કત્લેઆમ ચલાવતા હોવાની વાતો બહાર આવી રહી છે.ત્યારે હવે ખેતરોના માલિકોએ પણ રાત્રિના સમયે પોતાના ખેતરોમાં અજાણ્યા ઈસમો દ્વારા કરવામાં આવેલી હિલચાલ અંગે પોલીસને જાણ કરવી હિતાવહ બની ગઈ છે.
આ અગે ઠાસરા પીએસઆઈ રાવને પુછતાં તેઓએ જણાવ્યું હતું કે આઠમાંથી પાંચ બળદની કતલ કરનારાઓમાં એક ઈસમ ઝડપાઈ ગયો હોવાથી હવે અન્ય તમામ ઈસમોને ઝડપી પાડવામાં આવશે.અમદાવાદના ઈસમોની સાથે સ્થાનિક ઈસમોની સંડોવણી હોવાની વાતને પોલીસે પણ સમર્થન આપ્યું હતું.ત્યારે ખેડા જીલ્લાના ગામડાના ખેતરોમાં નિર્દોષ પશુઓની કતલેઆમ કરીને હાડ,માંસ,ચામડા અમદાવાદ વહન કરનારા ઈસમો સામે પોલીસની સખ્તાઈ જરૃરી થઈ પડી છે,જ્યારે ખેડા જીલ્લાના જીવદયા પ્રેમીઓએ પણ આ બાબતે પોતાની કામગીરી સ્પષ્ટ કરવી જોઈએ,તેમ જણાઈ રહ્યું છે.

ડાકોરની ધર્મશાળાના નોકરે નહાતી યુવતીઓના ફોટા પાડયા


નડિયાદ,તા.૨૭

ખેડા જિલ્લાના સુપ્રસિધ્ધ યાત્રાધામ ડાકોરમાં આવેલી એક ધર્મશાળામાં મુંબઈથી આવેલા યાત્રીઓ રોકાયા હતા,ગઈકાલે યાત્રીઓના પરિવારની યુવતીઓ બાથરૃમમાં નહાતી હતી,ત્યારે ધર્મશાળાના નોકર દ્વારા મોબાઈલમાં ફોટા પાડયા હતા,આ વાતની જાણ થઈ જતાં ભારે હોબાળો મચી જવા પામ્યો હતો.

  • ધર્મશાળામાં હોબાળો છતાં ડાકોર પોલીસ અજાણ

ધર્મશાળાના સંચાલકો દ્વારા કોઈપણ પ્રકારે વાતને દબાવી દેવાના પ્રયાસમાં તાત્કાલિક ધોરણે નોકરને કાઢી મુક્યો હતો,અને યાત્રીઓની માફી માગીને પોલીસ ફરિયાદ નહિ કરવા વિનંતી કરી હતી.જો કે લોકોમાં ચર્ચાતી વાતો મુજબ આ સમયે પોલીસે ધર્મશાળાની મુલાકાત લીધી હતી,પણ કોઈ ફરિયાદ થઈ નથી,જ્યારે પોલીસ આ બાબતે અજાણ હોવાનું જણાવી રહી છે.યાત્રાધામની ધર્મશાળાઓમાં યાત્રીઓની અંગત વાતોમા દરમ્યાનગીરી કરીને અશ્લિલતા ફેલાવી રહેલા આવા તત્વોને કારણે ડાકોરની ગરિમાને નુકસાન પહોંચી રહ્યું છે,જ્યારે યાત્રીઓને પણ ડાકોરમાં રોકાવુ ભારે પડી રહ્યું હોવાની લાગણી જોવા મળી રહી છે.

ખેડા જિલ્લાના સુપ્રસિધ્ધ યાત્રાધામ ડાકોરમાં બિરાજમાન ભગવાન રણછોડરાયના દર્શન કરવા માટે દેશભરમાંથી શ્રધ્ધાળુ ભક્તો આવે છે.ડાકોરમાં આવતા કેટલાયે શ્રધ્ધાળુઓ રાત્રિ રોકાણ કરીને વહેલી સવારે મંગળા આરતીના દર્શનનો લાભ લેવાનું ચુકતા નથી.જેને કારણે ડાકોરની મોટાભાગની ધર્મશાળાઓ અને ગેસ્ટ હાઉસોમાં યાત્રીઓની ભારે ભીડ રહે છે.

ડાકોરમાં બદનામ બની ગયેલી કેટલીક ધર્મશાળાઓ અને ગેસ્ટહાઉસોમાં ગેરકાયદેસર અને યાત્રાધામની ગરિમાને કલંકીત કરી રહેલા કૃત્યો ખુલ્લેઆમ ચાલી રહ્યા છે,તેમ છતાં પોલીસની આંખ આડા કાન કરવાની નિતીને કારણે ર્ધામિક યાત્રીઓને ભારે શરમજનક હાલતમાં મુકાઈ જવું પડે છે.ગતરોજ કેટલાક યાત્રીઓ મુંબઈથી ડાકોરની યાત્રાએ આવ્યા હતા.આ યાત્રીઓમાં યુવતીઓ પણ હતી.ડાકોરના ગેસ્ટ હાઉસોમાં ચાલતા ગોરખધંધાઓને કારણે યાત્રીઓએ મંદિર રોડ ઉપરની એક ધર્મશાળામાં રોકાવું પસંદ કર્યું હતું.

ડાકોરની ધર્મશાળામાં રોકાયેલા યાત્રીઓ સ્નાન કરીને દર્શન કરવા માગતા હોવાથી એકપછી એક નહાવા જતા હતા.યાત્રામાં આવેલી યુવતીઓ બાથરૃમમાં નહાવા ગઈ હતી,આ દરમ્યાન કલાકોથી વાટ જોતો ધર્મશાળાનો નોકર તક શોધીને ચોક્કસ જગ્યાએથી બાથરૃમમાં નિર્વસ્ત્ર થઈને સ્નાન કરી રહેલી યુવતીઓના ફોટા અને વિડીયો ઉતારવામાં મશગુલ બની ગયો હતો.ધર્મશાળાના નોકર દ્વારા મોબાઈલથી ફોટા તેમજ વીડીયો ઉતારવામાં આવી રહી હોવાની જાણ થતાં જ યુવતીઓએ બુમાબુમ કરી હતી,જેને પગલે નોકરને ઝડપી પાડીને યુવતીના પરિવારજનોએ પોલીસને જાણ કરવાની તૈયારી આરંભી હતી.પરંતુ ધર્મશાળાના સંચાલકે ચતુરાઈ વાપરીને નોકરને ફટકારીને તેની પાસેથી મોબાઈલ ઝુંટવી લીધો હતો,અને તેને તાત્કાલિક નોકરીમાંથી કાઢી મુકીને ભાગી છુટવાનો મોકો આપ્યો હતો.નોકરની બદમાશીથી અકળાયેલા મુંબઈના યાત્રીઓ ગુસ્સે ભરાયેલા હતા અને પોલીસ ફરિયાદની વાતો કરતા હતા,જેથી ધર્મશાળાના સંચાલકે તેઓને ઠંડા પાડીને સમજાવ્યા હતા.જેને પગલે યાત્રીઓએ પોલીસ ફરિયાદ કરવાનું ટાળ્યું હતું.જો કે ભારે બુમાબુમ અને હોબાળાને કારણે મોટી સંખ્યામાં લોકોના ટોળેટોળા ધર્મશાળામાં એકઠા થઈ ગયા હતા.ડાકોર પોલીસ પણ ત્યાં પહોંચી ગઈ હતી,પણ કોઈપણ જાતની ફરિયાદ દાખલ થઈ નથી.આ અંગે ડાકોરના પીએસઆઈ સોલંકીને પુછતાં તેઓએ આવો કોઈ બનાવ બન્યો નથી,તેમ જણાવ્યું હતું.

ડાકોરની ધર્મશાળામાં બહારગામથી ભગવાન રણછોડરાયના દર્શનાર્થે આવતી અને રોકાતી યુવતીઓના બાથરૃમ ફોટો અને વિડીયો ઉતારવામાં આવી રહી હોવાની વાતે સમગ્ર ડાકોરના ગેસ્ટ હાઉસો અને ધર્મશાળાઓ શંકાના દાયરામાં આવી ગઈ છે.ડાકોરના કેટલાક ગેસ્ટ હાઉસો અને ધર્મશાળાઓ તો ઐયાશીના ઠેકાણા બની ગયા છે,ત્યારે ડાકોર પોલીસ દ્વારા યાત્રાધામ ડાકોરની ગરિમાને કલંકિત કરતા આવા તત્વોને નેસ્તનાબુદ કરવા પ્રયત્નો કરવા જોઈએ તેવી માંગ સમગ્ર ડાકોરના રહીશો અને યાત્રીઓમાં ઉઠી રહી છે.

શાળાના શિક્ષકો અને કઠલાલ નિરીક્ષક સામે કાર્યવાહીની માંગ


નડિયાદ, તા.૧૯

ખેડા જિલ્લાના કઠલાલ તાલુકાની પ્રાથમિક શાળાના બાળકો અને ૪ શિક્ષકોને શાળાના મુખ્ય શિક્ષક કોઈપણ જાતની પરવાનગી વિના ચાલુ શૈક્ષણીક કામગીરી દરમ્યાન પોતાના પુત્રના લગ્નમાં ગોઠવેલ ભોજન સમારંભમાં લઈ જતાં મધ્યાહન ભોજન અધિકારીના હાથે ઝડપાઈ ગયા હતા,જેને પગલે શાળાના મુખ્ય શિક્ષક સહિત અન્ય ૪ શિક્ષકો અને જાણ કરવા છતાં આ શિક્ષકો સામે કાર્યવાહી નહિ કરીને શિક્ષકોને આડકતરી રીતે પ્રોત્સાહન આપનાર કઠલાલ તાલુકા કેળવણી નિરીક્ષક સામે કડક કાર્યવાહીની માગણી થતાં જિલ્લાભરના પ્રાથિક શિક્ષણમાં ખળભળાટ મચી જવા પામ્યો હતો.

આ અંગે પ્રાપ્ત વિગતોનુસાર ખેડા જિલ્લાની પ્રાથમિક શાળાઓમાં ફરજ બજાવતા પ્રાથમિક શિક્ષકો યેનકેન બહાને શાળાઓમાંથી ગિલ્લીઓ મારતા રહે છે.

જિલ્લા પ્રાથમિક શિક્ષણ તંત્ર અને તાલુકા કેળવણી નિરીક્ષકો તેમજ બીટ નિરીક્ષકો દ્વારા માત્ર ને માત્ર દેખાડા ખાતરની શાળા મુલાકાતો અને ઈસ્પેક્શનો કરવામાં આવતા હોવાથી પ્રાથમિક શિક્ષકો બેદરકાર બનીને બાળકોના શૈક્ષણીક ભવિષ્ય સાથે ચેડાં કરી રહ્યા હોય તેમ જોવા મળી રહ્યું છે.તેમાં તો વળી કેટલાક કેળવણી અને બીટ નિરીક્ષકો તો ઈસ્પેક્શન કરવા માટે શિક્ષકદીઠ રૃ.પ૦૦ થી ૧૦૦૦ ઉઘરાવી રહ્યા હોવાની વાતો પણ શિક્ષણ આલમમાં સંભળાઈ રહી છે.પ્રાથમિક શિક્ષકોની બેદરકારીના કિસ્સા સૌથી વધુ ખેડા જિલ્લાના કઠલાલ,કપડવંજ અને બાલાસિનોર તાલુકામાં જોવા મળી રહ્યા છે.

ગત તા.૭-૩-૧૧ના રોજ ખેડા જિલ્લા નાયબ પ્રાથમિક શિક્ષણાધિકારી મધ્યાહન ભોજન યોજના દ્વારા કઠલાલ તાલુકાની લાડવેલ પ્રાથમિક શાળાની ઓચિંતી મુલાકાત લેતાં બપોરે ૧.૩૦ કલાકે શાળા બંધ હોવાને કારણે મધ્યાહન ભોજન બંધ હતું.શાળા બંધ હોવાને કારણે મધ્યાહન ભોજન બંધ રહેતાં અધિકારીએ તપાસ હાથ ધરી હતી.જેમાં શાળાના બોર્ડ ઉપર બાળકો વન મહોત્સવમાં લઈ જવામાં આવ્યા હોવાનું લખવામાં આવ્યું હતું.જ્યારે તપાસ કરતાં જાણવા મળેલ કે શાળાના તમામ બાળકોને તા.૭-૩-૧૧ના રોજ શાળાના મુખ્ય શિક્ષક અને કઠલાલ તાલુકા પ્રાથમિક શિક્ષક સંઘના મહામંત્રી ગણપતસિંહ એમ.ચૌહાણના પુત્રના લગ્નનો ભોજન સમારંભ હોવાથી જમવા માટે ૮ કિ.મી.દૂર બાબાના મુવાડા ગામ ખાતે ૩ ટ્રેક્ટરોમાં લઈ જવામાં આવ્યા હતા.શાળામાં પ્રાર્થના કર્યા બાદ તુરંત જ બાળકોને શૈક્ષણીક કાર્ય કરાવવાને બદલે કોઈપણ જાતની પરવાનગી લીધા વિના તેમજ રજા રિપોર્ટ મુક્યા વિના મુખ્ય શિક્ષક અને અન્ય ૪ શિક્ષકો શાળાના તમામ બાળકોને લગ્ન પ્રસંગમાં લઈ ગયા હોવા અંગે શાળાની મુલાકાત લેનાર અધિકારીએ કઠલાલ કેળવણી નિરીક્ષકને જાણ કરીને યોગ્ય તપાસ કરીને જિલ્લા પ્રા.શિક્ષણાધિકારીને રીપોર્ટ કરવા જણાવ્યું હતું.મધ્યાહન ભોજન અધિકારી શાળામાં આવ્યા હોવાનું જાણીને બપોરના ૩ વાગ્યા પછી કેટલાક બાળકોને શાળામાં પાછા લાવવામાં આવ્યા હોવાનું પણ જાણવા મળ્યું હતું.શાળાના ૬ શિક્ષકો તાલિમમાં ગયા હતા,જ્યારે મુખ્ય શિક્ષક ઉપરાંત ચાર શિક્ષકો મહેમુબમીયાં ખોખર, લાલાભાઈ એસ.પટેલ, પ્રેમીલાબેન જે.ઠાકોર,નયનાબેન પી.પટેલ બાળકોને લઈને લગ્નના ભોજન સમારંભમાં ગયા હોવાનું મધ્યાહન ભોજન અધિકારી કે.પી.પટેલે જણાવ્યું હતું.જેને પગલે તેઓએ તમામ શિક્ષકોને નોટિસ આપીને ખુલાસો કરવા જણાવ્યું હતું,જ્યારે કેળવણી નિરીક્ષકને ઉપરોક્ત શિક્ષકો સામે કાર્યવાહી કરવા જણાવ્યું હતું.

મધ્યાહન ભોજન અધિકારીએ લાડવેલ પ્રાથમિક શાળાની મુલાકાતમાં શાળા બંધ જોવા મળી હોવા અંગેની જાણકારી આપવા છતાં કઠલાલ કેળવણી નિરીક્ષક એ.ડી.ડાભી દ્વારા જવાબદાર મુખ્ય શિક્ષક અને સ્ટાફ સામે કાર્યવાહી ન કરતાં કે.પી.પટેલે ખેડા જિલ્લા પ્રાથમિક શિક્ષણાધિકારી તેમજ પ્રાથમિક શિક્ષણ નિયામકને લેખિતમાં રજુઆત કરી હતી કે લાડવેલ પ્રા.શાળાના મુખ્ય શિક્ષક તાલુકા સંઘના મહામંત્રી હોવાથી કેળવણી નિરીક્ષક દ્વારા તેઓની સામે કાર્યવાહી કરવાની ટાળી હોવાના આક્ષેપ સાથે જણાવ્યું હતું કે તા.ર૯-૧૦-ર૦૦રનો સરકારના પરિપત્ર હોવા છતાં કઠલાલ તાલુકાના કેળવણી નિરીક્ષક છેલ્લા ૧૦ વર્ષથી એક જ જગ્યાએ ફરજ બજાવી રહ્યા છે,પરિપત્ર મુજબ કોઈપણ કેળવણી નિરીક્ષકની વર્ષે એકવાર ઉનાળામાં બદલી કરવી અથવા તો વધુમાં વધુ ૪ વર્ષ બાદ જે તે સ્થળેથી અન્યત્ર બદલી કરવી તેમ છતાં કઠલાલ કેળવણી નિરીક્ષક ૧૦ વર્ષથી એક જ સ્થળે ફરજ બજાવી રહ્યા હોવાનો પણ આક્ષેપ કર્યો હતો.લાડવેલ પ્રાથમિક શાળાના બાળકોનું શિક્ષણ અને મધ્યાહનને કોઈપણ પરવાનગી વિના બંધ રાખનાર શાળાના મુખ્ય શિક્ષક,સ્ટાફ અને જવાબદાર કેળવણી નિરીક્ષક સામે કાર્યવાહી કરવાની માગણી કરી હતી,જ્યારે કેળવણી નિરીક્ષક વર્ષોથી એકની એક જગ્યાએ ચીટકી રહ્યા હોવાથી તેઓની તાત્કાલિક અસરથી અન્યત્ર બદલી કરવાની પણ માગણી કરીને તમામની સામે ખાતાકીય તપાસની માગણી કરી હતી.આ અંગે ખેડા જિલ્લા પ્રાથમિક શિક્ષણાધિકારીને પુછતાં તેઓએ જણાવ્યું કે તાલુકા કેળવણી નિરીક્ષકનો રીપોર્ટ હજી સુધી આવ્યો નથી,રીપોર્ટ આવ્યા પછી કાર્યવાહી કરવામાં આવશે.જ્યારે વર્ષોથી એક જ સ્થળે ફરજ બજાવવા બાબતે તેઓએ જણાવ્યું હતું કે જે નિયમાનુસાર હશે,તેમ કરવામાં આવશે.મધ્યાહન ભોજન અધિકારીએ કરેલી રજુઆતને પગલે સમગ્ર પ્રાથમિક શિક્ષણ વિભાગમાં ખળભળાટ મચી જવા પામ્યો છે.

ખેડા જિલ્લામાં સરકારી પડતર જમીનો ઉપર ગેરકાયદે અડીંગો


નડિયાદ, તા.૨૧

ખેડા જીલ્લાની કરોડો રૃપીયાની સરકારી જમીનોનો ઉપયોગ જિલ્લાના અધિકારીઓની ભ્રષ્ટાચારી નિતીને કારણે વગ ધરાવતા ઈસમો મફતના ભાવમાં કરી રહ્યા હોવાની અનેક ફરિયાદો ઉઠતી રહી છે.ગ્રામ પંચાયત વિસ્તારોમાં આવેલી ગૌચર તેમજ સરકારી પડતર જમીનો ઉપર જે તે પંચાયતના સરપંચ કે તલાટી સાથે સાંઠગાંઠ ધરાવતા ઈસમોએ ઘણા વર્ષોથી અડીંગો જમાવી દીધો છે,અને તેમ છતાં તાલુકા તેમજ જિલ્લા વિકાસ અધિકારી કચેરી દ્વારા આવી સરકારી જમીન ઉપરના ગેરકાયદેસર દબાણો દૂર કરવામાં ભારે ઉદાસીનતા દાખવવામાં આવી રહી હોવાથી અનેક શંકા કુશંકાઓ ઉપજી રહી છે.ખેડા તાલુકાના ચિત્રાસર ગ્રામ પંચાયતની માલિકીની સરકારી પડતર જમીનમાં છેલ્લા કેટલાક વર્ષોથી સરપંચ અને તલાટીની રહેમનજર હેઠળ ખેતી કરવામાં આવી રહી છે.આજે આ જમીનની કિંમત કરોડોમાં બોલાઈ રહી છે,ત્યારે દબાણકર્તા દ્વારા એકપણ રૃપીયાની ચુકવણી વિના કરોડોની જમીન ઉપર કબજો જમાવી દીધો હોવાની ફરિયાદ ચિત્રાસર ગામના નાગરિક દ્વારા ખેડા જિલ્લા કલેક્ટરને કરવામાં આવી છે.

તાલુકામથક ખેડાની ચિત્રાસર ગ્રામ પંચાયતની માલિકીની સરકારી પડતર જમીન સત્તા પ્રકાર નંબર ૧૪ર અને ખાતા નંબર ર૬૪માં આશરે ર૦ વીઘા જેટલી જમીન આવેલી છે.આ જમીન ઉપર ગ્રામ પંચાયતના સરપંચ અને તલાટીએ ભાગ રાખીને ઉપરોક્ત જમીન પોતાના મળતીયા વ્યક્તિઓના નામે ખેડતા હોવાની લેખિત ફરિયાદ તા.રપ-૧૦-ર૦૧૦ના રોજ ચિત્રાસર ગામના અરજદાર ગૌતમભાઈ ઈશ્વરભાઈ શ્રીમાળી દ્વારા કરવામાં આવી હતી.ગ્રામ પંચાયતની માલિકીની સરકારી પડતર જમીન ઉપર સરપંચ તેમજ તલાટી દ્વારા ડાંગર તેમજ ઘઉં જેવા પાકો લેવામાં આવે છે,અને વર્ષે દહાડે લાખ્ખો રૃપીયાની આવક રળવામાં આવી રહી છે.સરપંચ તેમજ તલાટીએ પોતાના બચાવ માટે આ જમીન સોનાબેન સોલંકી દ્વારા ખેડવામાં આવતી હોવાની વાતો કરવામાં આવી રહી છે.ત્યારે પંચાયતની માલિકીની સરકારી જમીન ઉપર અન્ય વ્યક્તિ પણ કોઈપણ જાતની પરવાનગી વિના કેવી રીતે ખેતી કરાવી શકે તેવા પ્રશ્નો ઉઠી રહ્યા છે.આમ આશરે પાંચ મહિના અગાઉ કરવામાં આવેલી લેખિત ફરિયાદ છતાં આજસુધી ચિત્રાસરની સરકારી જમીનને દબાણકારો પાસેથી મુક્ત કરાવવામાં જિલ્લા વિકાસ અધિકારી પણ નિષ્ફળ રહેતાં ઉપરથી નીચે સુધીના તમામ અધિકારીઓ સામે શંકાઓ ઉપજી રહી છે.આ મામલે ખેડા જિલ્લા વિકાસ અધિકારી મનીષાબેન ચંદ્રાને ટેલિફોનીક પુછતાં તેઓએ આવી તો અનેક ફરિયાદો ચિત્રાસર ગામની ચાલી રહી છે,તમે કંઈ વાત કરો છો,તે મને સમજાતુ નથી,હું મિટીંગમાં છું,બે દિવસ પછી વાત કરજો જેવા જવાબો આપીને ઉપરોક્ત કરોડોની સરકારી જમીનના મામલે કોઈ સચોટ જવાબ આપવાનું ટાળ્યું હતું.

ચિત્રાસર ગામના અરજદારના જણાવ્યા મુજબ એક વીઘા જમીનના ૧પ લાખથી વધુની કિંમતની આશરે ર૦ વીઘા જેટલી સરકારી પડતર જમીન ઉપર ગ્રામ પંચાયતના સરપંચ અને તલાટીના ઈશારે ચોક્કસ વ્યક્તિ દ્વારા દબાણ કરવામાં આવ્યું છે.આ ર૦ વીઘા જમીનની કિંમત આશરે ત્રણ કરોડ રૃપીયા જેટલી થાય છે,ત્યારે સરકારી માલિકીની આ જમીન ઉપર સરકારી અધિકારીઓ અને લાગતાવળગતાઓની મિલીભગતને કારણે વર્ષોથી દબાણ જમાવી દેવામાં આવ્યું છે.ખેડા તાલુકા વિકાસ અધિકારી કે ખેડા જિલ્લા વિકાસ અધિકારી દ્વારા વર્ષોથી કરોડોની જમીન ઉપર દબાણ કરીને બેસી ગયેલા ઈસમોને દૂર કરવાની કોઈપણ કાર્યવાહી હાથ ધરવામાં આવી નથી.આ બાબતે ખેડા તાલુકા વિકાસ અધિકારી અમીનને પુછતાં તેઓએ જણાવ્યું હતું કે જમીન ઉપર દબાણ કરનાર દબાણકારને નોટિસ આપવામાં આવી છે,તેમ છતાં આ મામલો કોર્ટમાં ચાલતો હોવાથી હજી સુધી જમીન દબાણકાર દ્વારા જ ખેડવામાં આવી રહી છે.આમ સરકારી ચોપડે સરકારી પડતર જમીન બોલતી આ ત્રણ કરોડથી વધુ કિંમતની જમીન ઉપર ગ્રામ પંચાયતના સરપંચ અને તલાટીના ઈશારે સોનાબેન સોલંકી દ્વારા ગેરકાયદેસર કબજો જમાવી દેવામાં આુવ્યો હોવાની ફરિયાદ પણ અરજદારે કરી હતી.અરજદાર દ્વારા ખેડા જિલ્લા વિકાસ અધિકારી સહિતના અધિકારીઓને વારંવાર લેખિત રજુઆત કરવા છતાં સરકારી જમીન ઉપરના દબાણો દૂર કરવામાં ન આવતાં આખરે અરજદારે આજે તા.૭-૪-૧૧ના રોજ મુખ્ય મંત્રી નરેન્દ્રભાઈ મોદી, ખેડા જીલ્લા કલેક્ટર અને ખેડા જિલ્લા વિકાસ અધિકારીને લેખિત રજુઆત કરીને જણાવ્યું હતું કે તેઓએ કરેલ રજુઆતને પગલે હજી સુધી સરકારી જમીન ઉપરના દબાણ દૂર કરવામાં આવ્યા નથી તેમજ સરકારી પડતર જમીન ઉપર અડીંગો જમાવીને તેને ખેડવામાં આવી રહી હોવા છતાં આ ગેરકાયદેસર પ્રવૃત્તિ બંધ કરાવવામાં આવી નથી.અરજદારના જણાવ્યા મુજબ ઉચ્ચ કક્ષાએથી તપાસ કરવામાં આવે તો સરકારી જમીન પચાવી પાડવાનું કૌભાંડ બહાર આવી શકે તેમ છે,અને જો તેઓ ખોટા સાબિત થાય તો પોતાની સામે કાર્યવાહી કરવામાં આવે ૃતેવી માગણી કરીને પોતાનો વિશ્વાસ વ્યક્ત કર્યો હતો.અરજદારો દ્વારા ગ્રામ્ય કક્ષાએ ચાલતા સરકારી જમીનના કૌભાંડો બહાર લાવવામાં આવતા હોવા છતાં તેઓને પ્રોત્સાહિત કરવાને બદલે ખેડા જીલ્લા વિકાસ અધિકારી દ્વારા સમગ્ર મામલાને દબાવી દેવાના પ્રયાસો કરવામાં આવતા હોવાની લાગણી પણ અરજદારમાં ઉઠી રહી છે.ત્યારે ખેડા જિલ્લા કલેક્ટર દ્વારા સરકારી પડતર જમીન ઉપર બેઠેલા ગેરકાયદેસર કબજેદારોને દૂર હટાવવા અને કરોડોની સરકારી જમીન ઉપર થઈ રહેતી ખેતી અટકાવવાની કામગીરી કરવામાં આવે ૃતેવી માગણી પણ અરજદાર દ્વારા કરવામાં આવી છે.જો કે આ મામલે પંચાયતના તલાટી શરદભાઈ મકવાણાને પુછતાં તેઓએ જણાવ્યું કે પંચાયતની સરકારી જમીન ઉપરથી દબાણ દૂર કરવાનો હુકમ થઈ ગયો છે,પરંતુ મામલો કોર્ટમાં ચાલતો હોવાથી કોર્ટનો ચુકાદો આવ્યા પછી જે ૃતે કાર્યવાહી કરવામાં આવશે.આમ સરકારની કરોડો રૃપીયાની જમીનના મામલે દબાણકર્તાની સામે સરકાર તરફથી પંચાયત દ્વારા ઢીલી નિતીઓ રાખવામાં આવતી હોવાનું અરજદારને જણાઈ રહ્યું છે.ત્યારે ચિત્રાસર પંચાયતની સરકારી જમીનનો વિવાદ ફરીથી વકર્યો છે.

ચિત્રાસરના સરપંચ અને તલાટી સામે આક્ષેપો

ખેડા તાલુકાના ચિત્રાસર ગ્રામ પંચાયતની માલિકીની આશરે ર૦ વીઘા જેટલી સરકારી પડતર જમીન છેલ્લા કેટલાક વર્ષોથી ગેરકાયદેસર રીતે ખેડવામાં આવતી હોવાની ફરિયાદ ગામના જ અરજદાર ગૌતમભાઈ શ્રીમાળી દ્વારા કરવામાં આવી હતી.અરજદારના જણાવ્યા મુજબ પંચાયતના સરપંચ કાનજીભાઈ પરમાર અને તલાટી શરદભાઈ મકવાણા દ્વારા અન્ય વ્યક્તિના નામે ખેડવામાં આવતી હોવાની રજુઆત કરવામાં આવી છે.જો કે આ અંગે તલાટી શરદભાઈ મકવાણાને પુછતાં તેઓએ જણાવ્યું હતું કે સમગ્ર મામલો કોર્ટમાં ચાલી રહ્યો છે,જેનો ચુકાદો આવ્યા પછી જે તે નિર્ણય કરવામાં આવશે.અરજદાર સરપંચના વિરોધી હોવાથી ખોટી રજુઆતો કરી રહ્યા હોવાનું પણ તેઓએ જણાવ્યું હતું.

કઠલાલથી ૪૦૦૦ કિલો ગૌ માંસનો જથ્થો ઝડપાઈ ગયો


નડિયાદ તા.૨૧ખેડા જિલ્લાના ગ્રામ્ય વિસ્તારોમાં બેરોકટોક ગેરકાયદેસર રીતે ચાલતા કતલખાનાઓમાં રોજેરોજ મુગા પશુઓની કતલેઆમ કરવામાં આવી રહી છે,સાથે સાથે ગાયો કે ગૌવંશની પણ કતલેઆમ કરવામાં આવે છે.ખેડા તેમજ પંચમહાલ જિલ્લાના ગામડાઓમાંથી અમદાવાદ તરફ રોજેરોજ વહન થઈ રહેલો માંસનો જથ્થો અવારનવાર ઝડપાતો રહે છે,તેમ છતાં કતલખાના ચલાવનારા અને માંસની હેરાફેરી કરનારાઓ આજેપણ પોતાનો કારોબાર ચલાવી જ રહ્યા છે.કઠલાલ ચોકડી ઉપર બાતમીના આધારે પોલીસે એક ટાટા ગાડીને રોકતાં તેમાંથી ૪૦૦૦ કિલો જેટલો માંસનો જથ્થો મળી આવ્યો હતો. પોલીસે ગાડીના ચાલક સહિત સાડા ચાર લાખનો મુદ્દામાલ ઝડપી પાડી કાયદેસર કાર્યવાહી હાથ ધરી હતી.        અમદાવાદ તેમજ વડોદરા જેવા શહેરોમાં રોજેરોજ માંસના જથ્થાની હેરાફેરી કરવામાં આવી રહી છે.ખેડા જિલ્લા ઉપરાંત પંચમહાલ જિલ્લાના ચોક્કસ ગામડાઓમાં ધમધોકાર ચાલતા કતલખાનાઓમાં રોજેરોજ અનેક મુગા પશુઓની કતલેઆમ કરવામાં આવે છે,અને ત્યારબાદ માંસ,ચામડા તેમજ શીંગડાં સહિતનો જથ્થો અમદાવાદના વેપારીઓને વેચી દેવામાં આવતો રહ્યો છે.પાછલા દિવસોમાં પણ કઠલાલ નજીકથી માંસનો જથ્થો પકડાયો હતો,અને માંસની હેરાફેરી કરનાર ઈસમે જણાવ્યું હતું કે આ જથ્થો તે બાલાસિનોરના ઈસમ પાસેથી લાવ્યોહતો,તેમ છતાં પોલીસે તે તરફ પગલાં ભરવાનું ટાળીને સમગ્ર મામલો દબાવી દીધો હતો.આજે કઠલાલ ચોકડી ઉપરથી એક ટાટા ગાડી (નં.જીજે-૧૮એક્સ-૩ર૭ર)માં માંસનો જથ્થો અમદાવાદ તરફ જઈ રહ્યો હોવાની બાતમીના આધારે પોલીસે ગાડીને રોકીને તપાસ કરતાં ગાડીમાંથી ૬ ગૌ માંસના ચામડા, ૧ર શિંગડા સહિત આશરે બે લાખની કિંમતનો  ૪૦૦૦ કિલો માંસનો જથ્થો ઝડપી પાડવામાં આવ્યો હતો.

પોલીસે ગાડી સહિત કુલ સાડા ચાર લાખનો જથ્થો કબજે લઈને ગાડીના ડ્રાયવર આરોપી સલીમભાઈ હુસેનભાઈ શેખ (રહે.લાલપુર,હિંમતનગર)ને ઝડપી પાડીને કાયદેસર કાર્યવાહી હાથ ધરી છે.ગૌમાંસના જથ્થા સાથે ઝડપાયેલા ડ્રાયવરે માંસનો જથ્થો અમદાવાદ લઈ જવામાં આવતો હોવાનું અને બાલાસિનોર થી લુણાવાડા રોડ ઉપરના એક ગામમાંથી નફુ અને રહિશ નામના ઈસમે માંસ ભરી આપ્યું હોવાની કબુલાત કરી હતી.ત્યારે હવે જોવું રહ્યું કે કઠલાલ પોલીસ અગાઉની જેમ આખા કેસનો પીલ્લો વાળી દે છે કે પછી માંસ આપનાર અને લેનાર બંને ઈસમો સુધી પહોંચે છે.કારણકે ભુતકાળમાં અનેકવાર માંસનો જથ્થો ઝડપી પાડવામાં આવ્યો હોવા છતાં પોલીસ ઝડપાયેલા આરોપી સુધી જ સિમિત રહીને આખી તપાસ ઉપર ત્યાં જ પુર્ણવિરામ મુકી દેતી આવી છે.ખેડા જીલ્લાના જીવદયા પ્રેમીઓ પણ જાણે કે પોલીસની રાહે ચાલતા હોય તેમ મુગા પશુઓની ખુલ્લેઆમ ચાલતી કતલેઆમ સામે ઝૂંબેશ ચલાવવાની નૈતિકતા ગુમાવી ચુક્યા હોય તેમ જોવા મળી રહ્યું છે.ત્યારે ખેડા જીલ્લા પોલીસ વડા દ્વારા ખેડા જિલ્લામાં ચાલતા કતલખાના અને માંસની હેરાફેરીને અટકાવવા તેના મુળ સુધી પહોંચવામાં આવે તેવી જિલ્લાભરની જનતા આશા રાખી રહી છે.

માંસની હેરાફેરી અને કતલાખાના ચલાવનારાઓ સામે પાસા કેમ નહીં ?

ખેડા જિલ્લામાં ખુલ્લેઆમ ચાલતા કતલખાના અને માંસની હેરાફેરીને કાબુમાં લેવા માટે પોલીસે જવાબદારો સામે પાસાની કાર્યવાહી કરવી જોઈએ,તેમ છતાં આજસુધી આવા ગુનામાં સંડોવાયેલા એકપણ આરોપી સામે પાસાની કાર્યવાહી કરવામાં આવી હોવાનું જાણવા મળેલ નથી. જિલ્લામાં મુગા પશુઓની નિર્દયી રીતે કતલેઆમ કરવામાં આવી રહી છે,તેમાંય વળી હિંદુઓ માટે પુજનીય એવી ગાયો તેમજ ગૌવંશની કતલેઆમ ર્ધાિમક લાગણીને ઠેંસ પહોંચાડવામાં આવી રહી છે,તેમ છતાં ખેડા જિલ્લા પોલીસ દ્વારા કતલ કરનારા કે માંસનો જથ્થો ખરીદનારા સુધી પહોંચવામાં નિષ્ફળ રહી છે,અને આ પ્રકારના નિર્દયી કૃત્યો કરનારા ઈસમો સામે પાસાની કાર્યવાહી કરવામાં કેમ નથી આવતી તેવા સવાલો ઉઠી રહ્યા છે.

કરોડોનો ચૂનો લગાડનાર ઠગ ટોળકી સામે પોલીસ ફરિયાદ


નડિયાદ તા.૨૧

જિલ્લામથક નડિયાદમાં આલિશાન ઓફિસ ભાડે રાખીને આણંદ તેમજ ખેડા જિલ્લાના ગ્રામ્ય વિસ્તારોના લોકોને લલચાવીને લોન આપવાને બહાને આશરે દશ હજાર જેટલા લોકો પાસેથી વ્યક્તિદીઠ રૃ.૧પ૦૦ થી ર૦૦૦૦ રૃ.જેવી રકમ ઉઘરાવીને કરોડો રૃપીયાનો ચુનો લગાવી જતાં ખેડા આણંદ જિલ્લાના ગ્રામ્ય વિસ્તારોના ગરીબ બેરોજગાર લોકો રસ્તા ઉપર આવી ગયા છે.નડિયાદ શહેર પોલીસને છેલ્લા ત્રણેક દિવસથી આ બાબતની ગંધ આવી ગઈ હોવા છતાં ફરિયાદીની વાટ જોઈને બેસી રહેતાં ઠગ ટોળકી ફરાર થઈ ગઈ હોવાની લાગણી રૃપીયા ગુમાવનારાઓમાં જોવા મળી રહી છે.નડિયાદ પોલીસે કરોડોની ઠગાઈ સામે માત્ર ર૦હજાર રૃપીયાની એક જ પોલીસ ફરિયાદ નોંધીને ઠગ ટોળકીના કારનામાઓને સામાન્ય દેખાડવાની કોશિષ કરવામાં આવી હોવાના આક્ષેપો પણ દબાતા અવાજે ઉઠી રહ્યા છે.

ખેડા જિલ્લાના વડામથક નડિયાદ ખાતે એક શોપીંગ સેન્ટરમાં દુન ભાડે રાખીને શિવમ કન્સલટન્સીના નામે ગૃપ લોન,પર્સનલ લોન, ખેતી(કૃષિ) લોન, ટુ વ્હીલર,થ્રી વ્હીલર,ફોર વ્હીલર,વ્હીકલ લોન,મોર્ગેજ લોન,હાઉસીંગ લોન,એજ્યુકેશન લોન આપવાની જાહેરાતો કરીને ગામડાના બેરોજગાર લોકોને લલચાવ્યા હતા.શિવમ કન્સલટન્સીના જવાબદારો દ્વારા અલગ અલગ ગામડાઓમાં મુલાકાત કરીને ગામલોકોને એકઠા કરીને જોઈએ તેવી લોન આપવા બાબતે સમજાવીને લોન માટેના દસ્તાવેજો કરાવવા ઓફિસે બોલાવવામાં આવતા હતા.છેલ્લા બે ત્રણ મહિનાથી રોજેરોજ ટોળાબધ્ધ લોકો ઓફિસમાં આવીને લોન માટેના દસ્તાવેજો સહી કરીને એગ્રીમેન્ટ માટે જરૃરી રૃ.૧પ૦૦ થી રૃ.ર૦૦૦૦ ભરવા લાગ્યા હતા.શિવમ કન્સલટન્સીના નામે ઠગાઈનો કારોબાર લઈને બેઠેલા ઈસમોએ આવનાર જરૃરિયાતમંદ પાસે જેટલા રૃપીયા ભરવાની સગવડતા હોય તે પ્રમાણેની લોન સ્કીમ સમજાવીને રૃપીયા ઉઘરાવવા માંડયા હતા.એગ્રીમેન્ટ થયા પછી આશરે એક મહિના બાદ લોન આપવાની ખાત્રી આપવામાં આવતી હતી,જ્યારે ગૃપ લોન માટે દશ કે વીસના ગૃપ બનાવવાની ગોઠવણ કરવામાં આવી હતી,જેમાં ગૃપ બનાવનારને વ્યક્તિદીઠ ચોક્કસ કમિશન આપવાની લાલચ આપવામાં આવી હતી,જેને પગલે જે તે વિસ્તારના લોકો પોતાની સાથે સાથે નજીકના મિત્રો, ઓળખીતા, સગાસંબંધીઓને બધુ કાયદેસર હોવાનો વિશ્વાસ આપીને લોન માટે રૃપીયા ભરવા તૈયાર કરી દીધા હતા. ખેડા અને આણંદ જિલ્લાના મહત્તમ તાલુકાઓના ગ્રામ્ય વિસ્તારોમાં ભણેલા અને અભણ તમામ લોકો લોન મેળવવાની આશાએ ઠગ ટોળકીની વાતો આવી જઈને એજન્ટ કે ગ્રાહક બનીને રૃપીયા આપવા લાગ્યા હતા.બે થી ત્રણ જ મહિનામાં આશરે દશ હજારથી વધુ ગ્રાહકો બનાવી તેમની પાસેથી એગ્રીમેન્ટ પેટે રકમ એકઠી કરી લઈને લોન આપવાની તારીખો નજીક આવતાં ઠગ ટોળકીએ શિવમ કન્સલટન્સીની ઓફિસને તાળા મારી દઈને છેલ્લા બે દિવસથી લોન માટે આવતા લોકોને અલગ અલગ જવાબો અને બહાના બતાવવાના શરૃ કરી દીધા હતા.લોકોની ઘોંસ વધી જતાં આખરે જે તે સાહેરની માતાનું અવસાન થયું હોવાનો કાગળ ઓફિસના શટર ઉપર ચોટાડી દઈને ભાગી છુટવાનો સમય મેળવવાની કોશિષ કરી હતી.પોતાની સાથે છેતરપીંડી થઈ હોવાનું જાણીને લોકોએ બે દિવસથી નડિયાદ શહેર પોલીસ સ્ટેશને પહોંચીને જાણ કરી હતી,પણ પોલીસ ફરિયાદ નોંધાયા પછી જ કાર્યવાહીના મુડમાં રહેતાં ઠગ ટોળકીના તમામ સભ્યો ફરાર થઈ ગયા હતા.જ્યારે ગઈકાલે દિવસભર છેતરપીંડીનો ભોગ બનેલા લોકો પોલીસ સ્ટેશને પહોંચી જતાં આખરે મોડી સાંજ બાદ પોલીસે એક માત્ર ખેડાના રહીશ હિતેશભાઈ ગોપાલભાઈ દરજી સાથે  રૃ.ર૦૦૦૦ની છેતરપીંડી થઈ હોવાની ફરિયાદ નોંધી હતી,જેમાં આરોપી તરીકે શિવમ કન્સલટન્સીના રાહુલભાઈ પટેલ અને કુમારભાઈ પટેલ નોંધવામાં આવ્યા હતા.પોતાની સાથે છેતરપીંડી થઈ હોવાથી અનેક અસરગ્રસ્ત ગ્રાહકો અને એજન્ટો પોલીસ મથકે ફરિયાદ કરવા માટે ગયા હોવા છતાં પોલીસે એક જ ફરિયાદ લઈને તમામને ફરિયાદ લઈ લીધી હોવાના જવાબો આપ્યા હતા.શિવમ કન્સલટન્સી દ્વારા કરોડો રૃપીયાની છેતરપીંડી અનેક લોકો સાથે કરી હોવા છતાં માત્ર રૃ.ર૦૦૦૦ની છેતરપીંડીની ફરિયાદ લઈને પોલીસ શું સાબિત કરવા માગે છે,તે કોઈને ખબર પડતી નથી.આરોપીઓને ઝડપી પાડવાને બદલે પોલીસ હાથ ઉપર હાથ ધરીને બેસી રહી છે,ત્યારે શિવમ કન્સલટન્સી સાથે જોડાયેલી ઠગ ટોળકીના તમામ સભ્યો તાબડતોબ વિદેશ ભાગી છુટવાની વેતરણમા હોવાની અથવા તો ભાગી છુટયા હોવાની વાતો સંભળાઈ રહી છે.

શિવમ કન્સલટન્સીના એજન્ટ તરીકે કામગીરી કરનારા અનેક લોકોની હાલત કફોડી બની જવા પામી છે,કારણ કે પોતાના રૃપીયા તો ગયા જ સાથે સાથે તેઓએ બનાવેલા અન્ય કેટલાયે ગ્રાહકોના રૃપીયા પણ ખોવાનો વારો આવ્યો છે.હવે ગ્રાહકો માત્ર ને માત્ર એજન્ટો ઉપર તવાઈ કરી રહ્યા છે.આણંદ,તારાપુર,મહેમદાવાદ સહિત બંને જિલ્લાઓમાં એજન્ટ તરીકે કામગીરી કરનારાઓમાં કેટલાક લોકો પોતાના ઘેર જઈ શકતા જ નથી,કારણ કે ગ્રાહકો તેમના ઘેર ઉઘરાણી કરવા બેઠા છે,જ્યારે એજન્ટ તરીકે જોડાયેલી કેટલીક મહિલાઓને મોબાઈલ ઉપર ધમકીઓ મળી રહી છે,કે અમારા પૈસા આપી દો નહિ તો તમારા બાળકોને ઉઠાવી જઈશું.આમ એજન્ટોની હાલત કફોડી બની જવા પામી છે.એક બાજુ શિવમ કન્સલટન્સીની ઠગ ટોળકી રૃપીયા લઈને ફરાર થઈ ગઈ છે,અને બીજી બાજુ ગ્રાહકો પોતાના પૈસાની માગણી કરી રહ્યા છે.આમ સામાન્ય કમિશન અને લોનની લાલચમાં એજન્ટો ફસાઈ ગયા હોવાનું પણ જોવા મળી રહ્યું છે.પોલીસ દ્વારા સત્વરે ઠગ ટોળકીને જબ્બે કરીને લોકોના પૈસા પરત કરાવવામાં નહિ આવે તો ગ્રાહકોના રોજના ત્રાસ અને ધમકીઓથી એજન્ટોને મરવાનો વારો આવે તેવી હાલત અત્યારે તો જોવા મળી રહી છે.ત્યારે જિલ્લા પોલીસ વડા દ્વારા કરોડોની ઠગાઈ કરીને ખેડા તેમજ આણંદ જિલ્લાના જરૃરિયાતમંદ લોકોને ઠગી લેનારા ઠગોને ઝડપી પાડવામાં આવે તેવી આશા રાખીએ.

 ફરિયાદીની વાટ જોતી પોલીસના વાંકે ઠગ ટોળકી પલાયન

શિવમ કન્સલટન્સી દ્વારા કરોડો રૃપીયાની છેતરપીંડી કરીને લોનને બહાને લોકોને ચુનો લગાવ્યો હોવાની વાતો જગજાહેર બની ગઈ હોવા છતાં નડિયાદ શહેર પોલીસે આળસ દાખવીને ફરિયાદીની વાટ જોતાં ઠગ ટોળકીને સમય મળી ગયો હતો,અને તેઓ ફરાર થઈ ગયા હતા.પોલીસે માત્ર ને માત્ર ર૦હજાર રૃપીયાની છેતરપીંડીની એક જ ફરિયાદ નોંધતાં અન્ય ભોગ બનેલા લોકોમાં ભારે રોષ જોવા મળી રહ્યો છે.કરોડોની છેતરપીંડી સામે માત્ર સામાન્ય રકમની ફરિયાદ થતાં પોલીસની કાર્યશૈલી સામે પણ અનેક સવાલો ઉઠી રહ્યા છે.આ લખાય છે ત્યાં સુધી નડિયાદ શહેર પોલીસે લોકો સાથે કરોડોની ઠગાઈ કરનાર ઈસમોની શોધખોળ હાથ ધરી હોવાનું પણ જોવા મળતુ નથી,ત્યારે અમદાવાદના અશોક જાડેજાની જેમ ગરીબ લોકોના રૃપીયા ખંખેરી જનારા શિવમ કન્સલટન્સીની ઠગ ટોળકીને ઝડપી પાડવામાં આવશે કે કેમ તેવા સવાલો લોકોમાં ઉઠી રહ્યા છે.

આરોપીઓના સાચા નામ અને ઓળખાણ બાબતે દ્રિધા નડિયાદ : નડિયાદ ખાતે શિવમ કન્સલટન્સીના નામે લોન આપવાને બહાને લોકો પાસેથી કરોડો રૃપીયાની ઉઘરાણી કરીને ફુલેકુ ફેરવનાર કન્સલટન્સી ચલાવનારાઓના સાચા નામ અને ઓળખ બાબતે ભારે દ્રિધા જોવા મળી રહી છે.પોલીસ ફરિયાદમાં રાહુલભાઈ પટેલ અને કુમારભાઈ પટેલના નામ લખવામાં આવ્યા છે,જ્યારે પી.જે.વ્યાસ નામના ઈસમનો પણ ઉલ્લેખ ભોગ બનનારાઓ દ્વારા કરવામાં આવી રહ્યો છે,પરંતુ આ ત્રૃણેય નામ સાચા છે કે ખોટા ? તેઓ ક્યાં રહે છે ? ક્યાંના વતની છે ? જેવી વાતો કોઈ ચોક્કસ રીતે જાણતુ નથી.આમ શિવમ કન્સલટન્સીની ઠગાઈમાં ભોગ બનેલા લોકો પણ તેઓના નામ સાચા છે કે કેમ તે બાબતે દ્રિધા અનુભવી રહ્યા છે.ખેડા જિલ્લા પોલીસ દ્વારા જે ૃતે દુકાન માલિક પાસેથી દુકાન ભાડે રાખનાર ઈસમ અંગેની જાણકારી અને ઓળખાણ પોલીસમથકે આપવામાં આવી હોય તેના આધારે જ પોલીસ ઠગ ટોળકી સુધી પહોંચી શકે તેમ છે,ત્યારે જોવું રહ્યું કે પોલીસ કંઈ થીયરી પ્રમાણે તપાસ ચલાવે છે.

ખેડા અને આણંદ જિલ્લાના અનેક લોકોએ પૈસા ગુમાવ્યા

નડિયાદ ખાતે શિવમ કન્સલટન્સીના નામે ગૃપ લોન સહિતની અન્ય લોન આપવાને બહાને કરોડો રૃપીયાની ઠગાઈ કરવામાં આવી હોવાની ફરિયાદો ઉઠી રહી છે.ખેડા તેમજ આણંદ જિલ્લાના અલગ અલગ તાલુકાના ગ્રામ્ય વિસ્તારોમાં ધંધો રોજગાર ઝંખતા બેરોજગારોએ લોન મેળવવા માટે યેનકેન પ્રકારે પૈસાની ગોઠવણ કરી હતી.પરંતુ તેઓની સાથે ઠગાઈ થઈ હોવાનું જાણતાં જ ધંધો રોજગાર મળવાને બદલે વધારાના દેવા તળે સપડાઈ ગયા હોવાનો અહેસાસ હાલમાં કરી રહ્યા છે.ખેડા જિલ્લાના મહેમદાવાદ, બાલાસિનોર, મહુધા,માતર,કઠલાલ તેમજ આણંદ,ખંભાત,તારાપુર,સોજિત્રા સહિતના તાલુકાના ગ્રામ્ય વિસ્તારોમાંથી અનેક લોકો ઠગ ટોળકીનો ભોગ બન્યા છે,અને પોતાના સહિત સમગ્ર ગૃપના પૈસા ગુમાવ્યા હોવાનુ જાણવા મળેલ છે

ગ્રાહકોને શું જવાબ આપવો : સલમાબેન શેખ

નડિયાદ ખાતે શિવમ કન્સલટન્સી દ્વારા લોન આપવાને બહાને એગ્રીમેન્ટના નામે કરોડો રૃપીયાનું ફુલેકુ ફેરવ્યાના અહેવાલો અખબારોમાં વાંચીને પૈસા ભરનાર લોકો એજન્ટ તરીકે કામ કરનાર મહેમદાવાદના સલમાબેન જાફરભાઈ શેખે જણાવ્યું હતું કે ગ્રાહકો અમારી પાસે આવીને ફોર્મ તમે ભર્યા છે,એટલે તમારે પૈસા આપવા પડશે,તેમ કહીને પોતાના પૈસા માગી રહ્યા છે.અમે તમામ ગ્રાહકોના પૈસા શિવમ કન્સલટન્સીમાં ભરી દીધા છે,ત્યારે અમે પૈસા ક્યાંથી આપીએ અને ગ્રાહકોને શું જવાબ આપવો એ જ સમજાતુ નથી.અમારી હાલત કફોડી બની જવા પામી છે.

આજે ૧ર લાખ લેવા બોલાવ્યો હતો : પરેશ વેલદાર

નડિયાદ ખાતે શિવમ કન્સલટન્સીની ઠગાઈનો ભોગ બનેલા તારાપુરના ચાંગડાના રહીશ પરેશભાઈ હરિભાઈ વેલદારે જણાવ્યું હતું કે પોતાના ર૪ ફોર્મની ફી ભરી હતી,કુમારભાઈ પટેલ અને જે.પી.વ્યાસને રકમ આપી હતી.આજે ર૧ તારીખે રૃ.૧ર લાખની લોનની રકમનો ચેક લેવા માટે બોલાવ્યો હતો,પણ અખબારોમાં વાંચીને જ ખબર પડી ગઈ કે આપણી સાથે ઠગાઈ કરવામાં આવી છે.હવે મારે મારા ગૃપના અન્ય લોકોને સમજાવવા અઘરા થઈ ગયા છે,સાંજ સુધી ઘેર જવાય તેમ નથી,તેમ પણ તેઓએ જણાવ્યું હતું.

ગ્રાહકો ફોન કરીને ધમકી આપી રહ્યા છે : રેહાનાબેન મણિયાર

આણંદ ખાતે ગાર્ડન સોસાયટીમાં રહેતા અને ખાનગી દુકાનમાં નોકરી કરતા રેહાનાબેન મણિયાર પણ નડિયાદની શિવમ કન્સલટન્સીમાં એજન્ટ તરીકે જોડાયા હતા.તેઓએ આણંદમાં ૧૦ અને તેઓના નણંદે માતર ખાતે ૧૮ ફોર્મ ભર્યા હતા.મજુરી કરીને ગુજરાન ચલાવતા લોકોએ લોન લઈને ધંધો કરવા માટે પૈસા ભર્યા હતા.રેહાનાબેને જણાવ્યું હતું કે એક બાબો અને એક બેબી હોવા છતાં ઘરના કામકાજ છોડીને અહીં આવતા હતા,આજે ફોર્મ ભરનારા તમામ લોકો ફોન ઉપર ધમકી આપે છે,અને કહે છે કે અમારા પૈસા આપો નહિ તો તમારા છોકરા ઉપાડી જઈશું,અને તમારી ઉપર કેસ કરીશું.હવે અમારી હાલત ખરાબ થઈ ગઈ છે.લોકોને કેવી રીતે સમજાવવું તે જ સમજાતુ નથી.

સાંઇબાબા મંદિરમાં દેરી હલતા કૌતુક


નડિયાદ તા.૨૨

ગતરોજ નડિયાદ શહેરના પશ્ચિમ વિસ્તારમાં આવેલા સાંઇબાબા મંદિર ખાતે બન્યો હતો સાયં આરતી બાદ એકોક સાઇનાથની દેરી હલવા લાગતા પ્રથમ નાસભાગ મચી જવા પામી હતી પરંતુ અંતે આ સાંઇનાથનો ચમત્કાર હોવાનું જાણી હજ્જારોની સંખ્યામાં શ્રધ્ધાળુઓ દર્શનાર્થે ઉમટી પડયા હતા ભક્તોની ભીડને જોતા મંદિરની આસપાસ પોલીસ બંદોબસ્ત પણ ગોઠવી દેવામાં આવ્યો હતો. નડિયાદ શહેર ઉપરાંત આસપાસની ગ્રામ્ય પ્રજા પણ આ ચમત્કારના દર્શન કરવા ઉમટી પડી હતી.

નડિયાદ શહેરના પશ્ચિમ વિસ્તારમાં સારદા મંદિર નજીક થોડા વર્ષો અગાઉ લાખ્ખો લોકોની આસ્થાના પ્રતિક સમાન સાંઇબાબા મંદિરનું નિર્માણ કરવામાં આવ્યું હતું. રોજ અનેક શ્રધ્ધાળુઓ મંદિરમાં દર્શનાર્થે આવતા હતા ગુરૃવારના દિવસે દર્શનાર્થીઓની સંખ્યામાં નોંધનીય વધારો જોવા મળતો હતો આસ્થા ઉપરાંત સમાજ સેવાની અનેક પ્રવૃત્તિઓ સાથે સંકળાયેલા આ મંદિરમાં ગતરોજ સાયં આરતી પૂર્ણ થયા બાદ લોકો સાંઇનાથની ર્મૂિતના દર્શન કરી રહ્યા હતા તે સમયે અચાનક જ સાંઇનાથની ર્મૂિત અને દેરી હલતી હોવાનું દર્શનાર્થીઓએ અનુભવ્યું હતું. સહુ પ્રથમ તો ભૂકંપની બીકે નાસભાગ મચી ગયા બાદ માત્ર દેરી જ હલતી હોવાનો અહેસાસ થતા લોકો પુનઃ મંદિરમાં પ્રવેશ્યા હતા. મંદિરના પૂજારી તથા અન્ય દર્શનાર્થીઓએ મંદિરની આસપાસના પરિસરમાં તપાસ કરતા માત્ર દેરી જ હલતી હોવાનું ધ્યાને આવ્યું હતું. આભાસ થતતો હોવાનું સમજી અનેક લોકોએ દેરીને સ્પર્શ કરતા ધ્રુજારી અનુભવાઇ હતી. આ વાત સમગ્ર વિસતારમાં વાયુવેગે પ્રસરી જતા રાત્રિના સમયે સાંઇના ચમત્કારના દર્શન કરવા હજ્જારોની સંખ્યા માં લોકો ઉમટી પડયા હતા વાહનો ઉપર શહેરના અનેક વિસ્તાર ઉપરાંત આસપાસના ગામડામાંથી પણ શ્રધ્ધાળુઓ દર્શનાર્થે આવી ચઢયા હતા.

લોકોની ભીડને જોતા મંદિરની આસપાસ પોલીસ પણ ગોઠવાઇ ગઇ હતી. મધ્યરાત્રી સુધી સાંઇમાં અખૂટ શ્રદ્ધા ધરાવતા લોકો મંદિરની મુલાકાતે આવતા રહ્યા હતા. અમૂક બુધ્ધિજીવીો હલતી દેરીને સાંઇનો ચમત્કાર માનવા તૈયાર ન હતા અમૂક દર્શનાર્થીઓએ દેરી ઉપરાંત મંદિર ઉપરના પતરા પણ હલતા હોવાનું અનુભવ્યું હતું. આ ચમક્તાકર છે કે કેમ તે ચકાસવા અનેક લોકો મંદિરની દિવાલોનો દેરીનો સ્પર્શ કરી ધ્રુજારી અનુભવાય છે કે કેમ તે ચકાસતા જોવા મળ્યા હતા. જો કે કારણ જે હોય તે પણ સ્થાનિકોમાં આ ઘટનાને પગલે શ્રધ્ધાનું ઘોડાપૂર ઉમટી પડયું હતું.

આ અંગે મંદિરના સંચાલક દેવેન્દ્રભાઇ પટેલે  (સાઇ સદાવ્રત, સાંઇમંદિર) જણાવ્યું હતું કે ત્રણ વર્ષ અગાઉ ૧૪-૫ ના રોજ મંદિરનું નિર્માણ કરવામાં આવ્યું હતું દર ગુરૃવારે મંદિર દ્વારા ગરીબોને ભોજન આપવાની સેવા પ્રવૃત્તિ ચલાવવામાં આવી રહી છે. ગતરોજ સાંજે ૭-૩૦ વાગ્યાથી દેરી હલતી જોવા મળી હતી થોડીવાર હલ્યા બાદ શાંત થતી દેરી પુનઃ હલવા લાગતી હતી આ સ્થિતિ લગભગ રાત્રીના ૧.૩૦ વાગ્યા સુધી રહી હતી આ વાત આસપાસના પંથકમાં પ્રસરતા સવારના પણ શ્રધ્ધાળુઓનો ભારે ઘસારો જોવા મળ્યો હતો. હાલમાં કળિયુગમાં આ ઘટના એક ચમત્કાર હોવાનું સહુ કોઇ માને છે.

ત્યારે સાંઇબાબાની દેરીના હલવા પાચળનું રહસ્ય અકબંધ રહેવા સાથે લોકોમાં શ્રધ્ધાનું ઘોડાપૂર હજી પણ ઉમટેલું જોવા મળી રહ્યું છે.

ચમત્કારની વાત જાણી અનેક લોકો ન્યૂઝ ચેનલ જોવા બેસી ગયા

નડિયાદ : શહેરના પશ્ચિમ વિસ્તારમાં આવેલ સાંઇબાબાના મંદિરની દેરી હલતી હોવાના સમાચાર પ્રસરતા જ અનેક લોકો સત્ય સાંઇબાબાની તબિયત જાણવા માટે ન્યૂઝ ચેનલ સામે ગોઠવાઇ ગયા હતા. બેય ઘટના એકબીજા સાથે સંકળાયેલી છે કે કેમ તે જાણવા લોકોએ સત્ય સાંઇબાબાની તબિયત વિશે સતત જાણકારી આપી રહેલ ન્યૂઝ ચેનલ જોઇ હતી. જો કે સત્ય સાંઇ બાબાની સ્થિતિ નાજુક હોવાનું જણાતા આ બેય ઘટના વિભિન્ન હોવાનું જણાયું હતું જો કે સાંઇમાં અખૂટ શ્રધ્ધા ધરાવતા હજ્જારો  લોકો હલતી દેરીના દર્શન કરવા ઉમટી પડયા હતા.

પાણીની ટાંકી ઉપર દેરી નિર્માણ પામી છે

નડિયાદ શહેરના પશ્ચિમ વિસ્તારમાં આવેલ શારદા મંદિર માર્ગ ઉપરના સાંઇબાબાના મંદિરમાં ગતરોજ કુતુહલ સર્જાતા ઘટના ઘટી હતી. સાયં આરતી બાદ અચાનકજ દેરી હલતી હોવાનું અનુભવતા શ્રધ્ધાળુોમાં ભારે કૂલુહલ  સર્જાવા પામ્યું હતું. અત્રે ઉલ્લેખનીય છે કે સદર દેરીનું નિર્માણ પામીની ટાંકી ઉપર ચણતર કરીને કરવામાં આવ્યું હતું. દેરીની નીચે આવેલ પાણીની ટાંકી ઉપર ચણતર કરી ૫ ફૂટનો ઓટલો બનાવી તેના ઉપર દોઢ ફૂટ જેટલી ઉંચાઇ ધરાવતી દેરીનું નિર્માણ કરી સાંઇનાથની પ્રતિમાની સ્થાપના કરવામાં આવી હતી.

વણસોલીમાં પરવાનગી વગર વૃક્ષોનું નિકંદન થતું હોવાની રાવ


મહેમદાવાદ તાલુકાના વણસોલી ગામે ઇન્દિરા નગરી વિસ્તાર પાસે કે જ્યાંથી રૃદણ મહુધા રોડ પરથી પસાર થાય છે તે રોડની બાજુમાં આવેલા વૃક્ષોનં સ્થાનિક ગ્રામપંચાયત દ્વારા આડેધડ નિકંદન કરાયું છે. ઇન્દિરા નગરીમાં વસતા પ્રજાજનોએ સરપંચની આ કામગીરી સામે વિરોધ વ્યક્ત કર્યો છે અને ખેડા જિલ્લા વિકાસ અધિકારીને લેખીતમાં રજુઆત કરી છે.

    • ગ્રામજનો દ્વારા ઉચ્ચ કક્ષાએ કરવામાં આવેલી રજૂઆત

અરજદારો વતી પુનમભાઇ રણછોડભાઇ વણકર, રમેશભાઇ મોરારભાઇ તથા મફતભાઇ ડાહ્યાભાઇના આવાસોની સામેના રોડની હદમાં આવેલા વૃક્ષો તથા ગ્રામપંચાયતની માલીકીના વૃક્ષો જેમા પીપળનંગ-૨, બાવળ નંગ-૨, ઉંદી નંગ-૨, લીમડા નંગ-૨ આમ કુલ ૮ વૃક્ષોનું બીનપરવાનગીએ નીકંદન કાઢી પંચાયતના વહિવટ કર્તાઓએ વેચી દેવાનો પ્રયાસ કરતા હોવાનો આક્ષેપ અરજદારોએ કર્યો છે. કોઇ અગમ્ય કારણોસર અથવા તો આ વિસ્તારના રહીશો માટે ચૂંટણીલક્ષી વયમનસ્ય રાખી ગ્રામપંચાયત દ્વારા તેના વહિવટ કર્તાઓએ પોતાનો રોષ વૃક્ષો પર ઉતારી બદલો લઇ રહ્યા હોય તેવુ પણ રજુઆતમાં જણાવાયું છે. ઉલ્લેખનીય છે કે રજુઆતના પગલે તાલુકામાંથી હજુ સુધી માત્ર નાયબ ટીડીઓ આવ્યા હતા. પરંતુ તેમણે પણ સ્થળ ચકાસણી કરી ન હોવાનું પણ લોકો જણાવી રહ્યાં છે.

વૃક્ષ નિકંદન બદલ સરપંચને ૨.૭૨ લાખનો દંડ ફટકાર્યો


નડિયાદ,તા. ૨૬

મહુધા તાલુકાના અલીણા ગ્રામપંચાયતના મહિલા સરપંચ દ્વારા સક્ષમ અધિકારીની પરવાનગી વિના ૧૬૭ જેટલા વૃક્ષોનું આડેધડ નિકંદન કરી દેવાના પ્રકરણમાં મામલતદારે રૃ.૨,૭૨,૬૦૦ ભરપાઇ કરવા હુકમ કર્યો છે. સરપંચે કલેક્ટરની પૂર્વ મંજુરી મેળવ્યા સિવાય પોતાના હોદ્દાનો દુરપયોગ કરી સરક્યુલર ઠરાવથી સત્તા હાસલ કરી ૧૬૭ વૃક્ષોની અનઅધિકૃત હરાજી ગોઠવી તેનાથી ગ્રામપંચાયતને વૃક્ષોની ઓછી ઉપજ મળી હતી. તે રકમ તથા દંડ મળી કુલ રકમ ૨,૭૨,૬૦૦ સરપંચ પાસેથી વસુલવા આદેશ કર્યો છે.

  • કલેકટરની મંજૂરી સિવાય ૧૬૭ વૃક્ષોનું નિકંદન

મહુધા તાલુકાના અલીણા ગામે રાણાચોકમાં રહેતા સતીષભાઇ રાણાએ આ અંગે ઉચ્ચ અધિકારીઓ સમક્ષ રજુઆત કરી સમગ્ર પ્રકરણનો પર્દાફાશ કર્યો હતો. તેમા જણાવાયું હતું કે મહુધા તાલુકાના અલીણા ગામમાં સીમ બ્લોકનંબર ૨૫૦૮ અને ૨૫૩૭ વાળી ગૌચર જમીનમાંથી કલેક્ટરની પરવાનગી વિના મહુધાની અલીણા ગામમાં સરપંચ ઉપરાંત તલાટી કમ મંત્રી, નાયબ કાર્યપાલક ઇજનેર વગેરેના મેળાપી પણાથી વૃક્ષોનું આડેધડ નિકંદન કરી દેવાયું હતું અનઅધિકૃત રીતે આ પ્રક્રિયા હાથ ધરવામાં આવી હતી.

આ અંગે સરપંચે પોતાની સત્તાનો દુરપયોગ કર્યો હતો. સરક્યુલર ઠરાવથી સત્તા પોતાને હસ્તક લઇ વૃક્ષોનું નિકંદન કરી ૮૩૫૦ મણ વૃક્ષ નિકંદન લાકડાની મણદીઠ કિંમત રૃ. ૩૦ ગણીએ તો રૃ. ૨,૫૦,૫૦૦  વૃક્ષોની કિંમત તથા તેમાથી ઉપજેલી રકમ રૃ. ૨૮,૦૦૦ મજરે આપતા રૃ. ૨,૨૨,૫૦૦નું નુકસાન ગ્રામપંચાયતને થયું હતું. કાંસની સાફ-સફાઇના બહાના હેઠળ ગૌચર જમીન માંથી અનઅધિકૃત વૃક્ષો કાપી કપાવી નાખ્યાનું ફલીત થયું હતું. આ અંગે સરપંચ સામે તેમણે કરેલી વૃક્ષો નિકંદન બાબતની તપાસ હાથ ધરાઇ હતી. જેમા તથ્ય જણાતા મામલતદારે મહિલા સરપંચગીતાબેન ભોજાણી પાસેથી રૃ. ૨,૭૨,૬૦૦નો દંડ વસુલ કરવા હુકમ કર્યો છે. દિન ૧૫માં આ રકમ ભરપાઇ કરવા પણ મામલતદારે તાકીદ કરી છે.

%d bloggers like this: